(A) సార్వభౌమత్వం - తౌహీద్ అర్రుబూబియ్యాహ్: అల్లాహ్ యొక్క సార్వభౌమత్వంలో మరియు దైవత్వంలో ఏకైకత్వం; సర్వలోకాల అధిపతి, ప్రభువు, యజమాని కేవలం అల్లాహ్ ఒక్కడే అని హృదయపూర్వకంగా విశ్వసించటం. ఆయనే సర్వలోకాల సృష్టికర్త, ప్రణాళికకర్త, పాలకుడు, పోషకుడు, రక్షకుడు.
(B) ఆరాధ్యత్వం- తౌహీద్ ఉలూహియ్యహ్: అల్లాహ్ యొక్క ఆరాధన లలో ఏకైకత్వం; “కేవలం ఒక్క అల్లాహ్ తప్ప, ఇంకెవ్వరూ ఆరాధనలకు అర్హులు కారు” అని విశ్వసించటం. ఇక్కడ ఆరాధనలు అంటే ప్రతి ఒక్క ప్రార్థన, వేడుకోలు, అర్థింపు, మొర, అదృశ్య శక్తుల సహాయం అర్థించటం, ప్రమాణం చేయటం, ఒట్టుపెట్టుకోవటం, పశుబలి, దానధర్మాలు చేయటం, ఉపవాసాలు ఉండటం, తీర్థయాత్రలు చేయటం మొదలైనవన్నీ.
(C) ఘనమైన పేర్లు మరియు సర్వోన్నత గుణవిశేషాలు - తౌహీద్ అస్మా వశ్శిఫాత్: శుభమైన పేర్లలో మరియు సుగుణాలలో, శుభమైన లక్షణాలలో అల్లాహ్ యొక్క ఏకైకత్వం; దీనిని క్రింద ఉదహరించిన విధంగా విశ్వసించటం:
(i) అల్లాహ్ స్వయంగా తెలిపిన లేక ప్రవక్త ముహమ్మద్ సల్లల్లాహు అలైహి వసల్లం ద్వారా తెలియ జేసిన తన శుభమైన పేర్లు మరియు విశిష్ఠ లక్షణాలు కాకుండా, మన ఇష్టానుసారం అల్లాహ్ కు ఎలాంటి పేర్లు లేక లక్షణాలు పెట్టకూడదు, ఆపాదించకూడదు;
(ii) అల్లాహ్ యొక్క శుభమైన పేర్లుకు సరితూగే పేర్లను, దివ్యార్హతలను ఇతరులెవ్వరికీ ఇవ్వకూడదు; e.
g. అల్ కరీమ్;
(iii) ఖుర్ఆన్ లో అల్లాహ్ స్వయంగా తెలిపిన మరియు ప్రవక్త ముహమ్మద్ సల్లల్లాహు అలైహి వసల్లం ఉపదేశించిన తన యొక్క విశిష్ఠ లక్షణాలన్నింటినీ, పూర్తిగా విశ్వసించవలెను. మన ఇష్టానుసారం వాటి అర్థాన్ని మార్చటం, లేదా పూర్తిగా నిర్లక్ష్యం చేయటం, విస్మరించటం, ఉపేక్షించటం లేదా అర్థాన్ని తారుమారు చేయటం లాంటివి చేయకూడదు.
ఇంకా వాటిని మన పరిమిత జ్ఞానదృష్టి ద్వారా ఏవైనా సృష్టితాలతో పోల్చటానికి, సారూప్యం చూపటానికి ప్రయత్నించకూడదు. ఉదాహరణ కు ఖుర్ఆన్ (V.20:5) లో తెలిపిన “అల్లాహ్ తన సింహాసనం పై అధివేష్టించి ఉన్నాడు” అనే విషయాన్ని మనకు తెలిసిన ప్రాపంచిక సింహాసనంతో పోల్చటం గాని, కూర్చోవటం అనే పనిని భూలోక జీవరాసులు కూర్చునే విధంగా ఊహించటం గాని చేయకూడదు.
“అమిత దయాళువు అయిన అల్లాహ్ సప్తాకాశాలపైన ఉన్న తన సింహాసనం పై తనకు శోభనిచ్చే విధంగా అధివేష్టించినాడు.” దిల్ హజ్ నెల 9వ తేదీన వచ్చే అరఫాత్ దినమున మరియు ప్రతి రాత్రి మూడవ ఝాములో ఆయన భూలోకానికి అతి దగ్గరలోని మొదటి ఆకాశానికి వస్తాడు. కాని ఆయన అపరిమితమైన దివ్యజ్ఞానం సర్వలోకాలలో వ్యాపించి యున్నది, అనంత విశ్వాన్ని పరివేష్టించి ఉన్నది.
అంతేకాని భౌతికంగా ఆయనే స్వయంగా లోకమంతా వ్యాపించిలేడు.
అల్లాహ్ ఇక్కడ, అక్కడ, ప్రతి చోటా, ఇంకా మనుషుల హృదయాలలో వ్యాపించియున్నాడనే భావన ఎంత మాత్రమూ వాస్తవం కాదు. ఖుర్ఆన్ (V.42:11)లో అల్లాహ్ ఇలా ప్రకటిస్తున్నాడు: ఆయనను పోలినదేదీ లేదు మరియు ఆయన అన్నీ వినేవాడూ, అన్నీ చూచేవాడూను
సృష్టితాలతో అస్సలు పోల్చలేని అల్లాహ్ దివ్యస్వరూపం, అల్లాహ్ దివ్యవినికిడి శక్తి మరియు అల్లాహ్ దివ్యదృష్టి యొక్క ప్రత్యేకతలను పై పవిత్ర ఆయత్ ధృవీకరిస్తున్నది. అంతే కాక ఖుర్ఆన్ (V.38:75) లో అల్లాహ్ ఇలా ప్రకటిస్తున్నాడు: “ఎవరినైతే నా రెండు చేతులతో సృష్టించానో, ఇది వారి కోసం”